Helpu goroeswyr cam-drin domestig
Rydym yn gweithio’n glos â gwasanaethau cam-drin domestig, ac asiantaethau allweddol eraill, i redeg ein Prosiect Rhyddid ledled y DU.
Rydym eisiau eich helpu chi i chwalu rhwystrau i rywun sy’n ffoi rhag cam-drin domestig, a sicrhau y gallant gyrraedd lle diogel gan wybod y bydd eu hanifail anwes yn ddiogel ac yn cael gofal cariadus nes byddant yn gallu bod gyda’i gilydd unwaith eto.
Os ydych yn helpu rhywun sy’n ffoi rhag camdriniaeth ddomestig, gofynnwch iddynt a oes ganddynt anifeiliaid anwes yn y cartref ac a oes angen help arnynt i’w maethu dros dro. Os gall anifeiliaid adael gyda’u perchennog ar yr adeg pan fyddant yn ffoi, bydd hyn yn golygu na fyddant yn cael eu gadael gyda’r cyflawnwr, lle gallant fod mewn perygl.
Di-dâl
Mae’r prosiect ar gael yn ddi-dâl, a byddwn yn talu costau pob triniaeth filfeddygol, bwyd ac unrhyw bethau eraill fydd ei angen arnynt pan fyddant yn ein gofal, (teganau, danteithion, a blancedi clyd ac ati).
Cyfrinachol
Bydd cŵn yn ddiogel gyda ni. Ni wnawn ni byth roi manylion eich cleientiaid i neb, gan gynnwys y gofalwr maeth a fydd yn gofalu am eu ci. Byddwn hefyd yn eu lleoli’n ddigon pell o’r fan lle mae’r perchennog yn ffoi.
Tîm Arbenigol
Mae gennym lawer o brofiad o helpu pobl a’u hanifeiliaid anwes i ffoi rhag cam-drin domestig. Rydym yn gweithio’n glos â gwasanaethau cam-drin domestig arbenigol, a byddwn yn deall eu sefyllfa.
Cymorth
Mi wyddom pa mor anodd y gall pethau fod i bobl pan fyddant yn gorfod gadael eu ci. Felly rydym yn diweddaru ein cleientiaid â newyddion a lluniau er mwyn iddynt weld sut mae eu ci’n setlo.
Gallwch atgyfeirio at ein Prosiect Rhyddid gan wybod ein bod yn wasanaeth arbenigol ar gyfer goroeswyr camdriniaeth ddomestig. Mae ein gwasanaeth am ddim, yn gyfrinachol ac mae gan ein tîm sydd i gyd yn fenywod flynyddoedd o brofiad o helpu goroeswyr a’u hanifeiliaid.
Rydym ymhlith yr aelodau a sefydlodd y Links Pet Fostering Group, sy’n golygu ein bod wedi cytuno i gydymffurfio â safonau gwasanaeth sydd wedi’u creu i sicrhau diogelwch a chymorth i oroeswyr a’u hanifeiliaid.
Gallwn hefyd gynnig gweminarau i elusennau a sefydliadau sy’n helpu goroeswyr camdriniaeth ddomestig, sy’n ymdrin â’r cysylltiad rhwng anifeiliaid anwes a cham-drin domestig, yn ogystal â golwg fwy manwl ar y Prosiect Rhyddid.
Gwasanaethau eraill
Gwasanaethau maethu arbenigol eraill ar gyfer anifeiliaid anwes